Sinule jolla oon lastentarasikhäissii lapsii

Mitä mie saatan lastentarhaalta ođottaat?

Tronjamin kommuuni laittaa saamelaislapsile lastentarhaassa semmoiset olot ette het tuntteevat ittensä turvaliseksi ja päästhään kehittämhään ommaa kieltä ja kulttuurii. Lastentarhaat ottaavat vaarin ette toimet sovitethaan lasten ijän, toimitasan, sukupuolen, sosiaalisen, etnisen ja kulttuurisen tavustan jälkhiin, myötäräknättynnä saamelais- ja kväänilasten kieli ja kulttuuri. Tämä oon Lastentaraslain,  Raamiplaanan ja Norjan ratifiseeraaman ILO sopimuksen nro 169 Osa IV jälkhiin.

Mie toivon ette minun lapsi oppii saamee lastentarhaassa

Sie saatat muistela lastentarhaale ette sie halluut ette sinun lapsi saapi saamen opetusta. Sen sie tehet siihen laihiin ette lastentaraspaikkaa hakkiissa kryssäät tämän kohđan eli muistelet tämän ko puhut lastentarhaan työteliijöitten kans. Silloin johtaaja ottaa sinhuun kontaktii ette pääsettä puhumhaan siitä kunka kielen oppimisen saatethaan oornata. Jos sie et ole lastentarashakemuksessa kryssäny sitä ette tarhaassa oon tarvet saađa saamen opetusta, se sie saatat muistela tämän hiljeminki täyttämällä šeeman mikä mennee lastentarasvirkakunnale:

Käytä tätä šeemaa ko tahđot ilmoittaat lapsen saamen opetuksheen eli pois siitä.

Lastentarhaat joissa oon saamelaislapsii, organiseeraavat saamen opetusta itte eli yhtheistyössä muitten lastentarhaitten kans. Feristan lastentarhaan saamelaisosakunta oornaa tasavälliin kokkoontumissii kaupungin muitten lastentarhaitten saamelaislapsile.

Lastentarhaat saattavat hakkeet rahhaa Saamentingalta etelä-, luulajan- ja pohjaissaamen opetusta varten.

Ota kontaktii kans jos sie et ole sikkari missä lastentarhaissa oon saamenkielissii lapsii.

Mie halluun ette minun lapsi oppii lastentarhaassa kväänii

Tääpänä Tronjamin kommuunissa ei opeteta kväänii yhđessäkhään lastentarhaassa, eikä lastentaraslaissa määrätä oikheuđesta siihen. Jos sulla oon lapsii joila oon tarvet oppiit kväänii, sie saatat puhhuut tästä lastentarhaassa ja yhtheistyössä sen kans soppiit kunka kväänin kielen ja kulttuurin saatais osaksi lastentaraspäivää.

Saamelaislastentarasosakunta Belnie

Tronjamin kommuunilla oon saamelaislapsile ommaa lastentarastarjontaa Feristan vapaailmalastentarhaassa. Ota kontaktii osakunnanjohtajhaan jos sie tahđon paikan sieltä; lisäksi kryssää sen lastentarashakemuksen huomhautuskentthään. Saamelaistavustaissii lapsii prioriteerathaan osakunnan paikkoin javossa. 

Tronjamin kommuuni oon eteläsaamelaisela alala. Saamelaisela osakunnala oon tääpänä pohjaissaamenkielissii työteliijöitä. Saamentinka maksaa kontingentin loppuvuoden 2026 aijan.

Feristan vapaailmalastentaras oon saamen kielen ja kulttuurin kohtaamispaikka suhtheessa muihin lastentarhaissiin. Tämä tarkoittaa ette sieltäkäsin ohjathaan kaupungin muita lastentarhaita, ja ette se oornaa kuukausittain kokkoontumissii missä saamelaislapset muista lastentarhaista saattaavat olla myötä yhđessä likilastentarhaan työteliijän kans.

Sinule jolla oon lapsii pohjakoulussa

Mitä mie saatan vaattiit koululta?

Sie saatat vaattiit ette koulu oornaa ette sinun lapsi saapi saamen opetusta sen jälkhiin miitä oppimislaki ja oppiplaanat siitä määräävät. Opetuksen saattaa anttaat paikan oma opettaaja, opetus saattaa olla kauko-opetusta, hospiteerausta eli näitten kombinasuuni. Tronjamin kommuuni freistaa, silloin ko se oon mahđolinen, ennemin anttaat opetuksen paikan päälä ko kauko-opetuksena. Tronjamissa net oppiijat jokka saavat opetuksen kaukona, saattaavat tarpheen jälkhiin olla myötä kielikokkoontumisissa. Niitten oppiijoitten oppitiimat joitten ensikieli oon saame, oon usheimitten ruijan tiimoin aikana. Koulut freistaavat välttäät ette saamen tiimat oon samhaan aikhaan praktilis-esteettisten faakkiin eli loppuuvitten faakkiin tiimoin kans.

Mie toivon ette minun lapsi päässee oppimhaan saamee koulussa tahi mie olen itte nuortenkouluoppiija ja halluun oppiit saamee

Sie joka olet huolettiija, häyđyt muistela sinun lapsen koulule jos sie halluut ette sinun lapsi oppii koulussa saamee. Jos sinun lapsi oon alkamassa koulun, sie piđät panna kryssin oppiijatietošeeman siihen kohthaan missä kysythään saamen tarpheesta. Silloin rektori ottaa sinhuun kontaktii ette pääsettä puhumhaan siitä minkälaissii mahđolisuuksii se oon olemassa oornata saamen opetusta, ja koska sinun lapsi saatttaa alkkaat sen kans. Prinsipissä sie saatat ilmoittaat tarpheesta koska vain kouluvuođen aikana, mutta met neuvotamma ette sie ilmoitat tarpheesta ennen 15. marsikuuta jos sie halluut saamen opetusta syksylä.

Jos tet puhutta saamee kotona, silloin ilmoita tarpheesta saađa saamee ykköskielenä; jos tet että puhu saamee kotona, sitte ilmoita tarpheesta saamesta kakkoskielenä.

Saamelaisila lapsila (lapsila joitten vanhiimista kuitenki yksi oon myötä saamenmantaalissa eli yhđelä oon oikheus olla siinä myötä) oon lain jälkhiin oikheus saađa saamen opetusta, vaikka asuttaiski saamen hallinta-alan ulkopuolela. Tämä oikheus oon voimassa sekä pohjakoulussa ette jatkokoulussa. Sen saattaa itte valita minkä saamen kielistä halluu ottaat, mutta oikheus oon rajattu yhtheen saamen kielheen. Jos se oon vähittäin 10 oppiijaa joitten ensikieli oon saame ja jokka halluuvat kaiken opetuksen saameksi, se kommuuni häyttyy oornata sen.

Hyvä tiettäät ennen ko ilmoitat sinun lapsen saamen opetuksheen

• Se ei ole sikkari ette kommuunilta löyttyy paikalinen sen kielen opettaja mitä sie halluisit. Silloin opetuksen organiseerathaan kauko-opetuksena ja/eli kokkoontumisinna.
• Jos opetus oon kauko-opetusta, se sie saatat huntteerata oonko sulla mithään preferenssii sillä mistä sie otat opetuksen, mahđolisesti mihin sie halluut ette sinun lapsi lähtee kielikokkoontumisheen.
• Vaikka meiltä löytyiski paikasta sen kielen opettaaja mitä sie halluut, se se ei ole sikkari ette opetusta annettais likikoulussa. Siinä taphauksessa lapsi saapi tarpheen jälkhiin kyytin oppipaikkhaan ja takaisin.
• Se oon lastentarhaan ja koulunkäynin alussa, koulun vaihettamisen yhtheyđessä ja jatkokoulauksheen siiryttäissä oppiijan, huolettiijoitten ja koulun yhtheinen eđesvastaus muistela saamen opetuksen tarpheesta. 

Oppimislaissa oon lissää tiettoo saamelaislasten oikheuksista pohjakoulussa.

Vuositiimamäärät

Oppiijoila jokka saavat saame kakkoskielenä -opetusta, oon lastenkoulussa oikheus 87 vuositiimhaan ja nuortenkoulussa 76 vuositiimhaan. Heilä oppiplaanana oon ijän ja kielitaidon jälkhiin joko saame 2 eli saame 3. Oppiijat joila saame oon ykköskielenä, oppiplaanana oon saame 1, ja heilä oon ensiaskelheela (1.–4. klassi) oikheus 160 vuositiimhaan, keskiaskelheela (5.–7. klassi) 104 vuositiimhaan ja nuortenaskelheela (8.–10. klassi) 95 vuositiimhaan.

Keskiaskelheen oppiijoile

• Sie päätät itte halluutko opetusta saamessa eli saameksi.
  Jos sulla oon saame ykkös- eli kakkoskielenä, sie et tartte ottaat sivukielen karaktääritođistusta. Sie saat kans vaphautuksen sivukielen opetuksesta siinä määrin ko se oon mahđolinen.
• Jos sulla oon saamen opetusta nuortenaskelheela, se sie saat halutessa vaphautuksen valintafaakista (vierokieli / engelskan syventäminen / työelämäfaaki). Sie saatat sen sijasta ottaat enämen saamen eli ruijan tiimoi.
• Jos sie saamen lisäksi halluut ottaat vierokielen, engelskan syventämisen eli työelämäfaakin, se sulla oon lupa siihen. Koulunomistaajala ei kouluvuođesta 26/27 alkkain ole velvolisuutta tarjota saamen syventämistä.
• Jos sie saat opetusta oppiplaanan saame 1 eli saame 2 jälkhiin, se se saattaa olla ette sinun 10. askelheela veđethään saamen eksaamenhiin. Jos kysymyksessä oon saame 1, sie saatat jouttuut ottamhaan sekä kirjalisen ette suulisen eksaamenin, jos saame 2, se suulisen eksaamenin.

Eksaamenii reguleeraavat lait sie löyđät opetuslain asetuksista.

Kväänin opetus

Tromssan ja Finmarkun ulkopuolela assuuvilla kväänioppiijoila ei tääpänä ole laila määrättyy oikheutta kväänin oppimisheen pohjakoulussa, mutta yksi Kväänin toimiplaanan toimista oon selvittäät olisko oppiijoila kaikkialla Norjassa mahđolisuus päästä oppimhaan kväänii.

Tronjamin kommuuni halluu ottaat vaarin kaupungin kvääniasukkhaista ja oon vuođesta 2024 freistanu yhtheistyössä Kväänin institutin, Norjan kväänit Keski-Norjassa ja Porsangin ja Naavuonon kielisentteriitten kans kväänin liki- ja kauko-opetuksen kombinasuunii. 

Ota kontaktii sinun likikoulhuun jos sulla oon pohjakoulussa lapsii jokka halluuvat oppiit kväänii.

Kommuunin saamen opetus lukuvuona 2026/2027

Ensikielen oppiijoile tarjothaan mahđolisuuđen ruijan lisäksi eli sen sijasta vieđä läpi lukemisen ja räknäämisen kansaliset pröövit saameksi.

Eteläsaame

Jos sie halluut eteläsaamen opetusta, se ota kontaktii sinun likikoulhuun. Kommuuni tekkee yhtheistyötä Eteläsaamen taitoparkin (Sørsamisk kunnskapspark) kans sen etheen ette saatettais tarjota kauko-opetusta minkä lisänä tarvittaissa oon kokkoontumissii Hattfjeldalissa. Saatama kans tehđä yhtheistyötä Rørosin kommuunin kans ja sen läpi hommata paikalisen opettaajan.

Pohjaissaame

Jos halluut pohjaissaamen opetusta, se ota kontaktii sinun likikoulhuun. Kommuuni tarjoo likiopetusta Sverreborgin koulussa, mikä oon eđesvastauksessa pohjaissaamen opetuksen työteliijöistä ja ko-ordineerauksesta. Koulun omistaaja oornaa opetustokat siihen laihiin ette oppijoila oon toissiiki joitten kans harjoitella saamee. Saamentokat oornathaan tasan/oppiplaanan jälkhiin.

Tronjamin privaattikoulut saattaavat ottaat kontaktii Sverreborgin koulhuun eli toimialan koulhuun jos halluuvat tulla koblatuksi Sverreborgin koulun pohjaissaamen opetuksen kans.

Luulajansaame

Jos sie halluut luulajansaamen opetusta, se ota kontaktii sinun likikoulhuun. Kommuuni tarjoo yhtheistyössä Eteläsaamen taitoparkin (Sørsamisk kunnskapspark) kans kauko-opetusta minkä lisänä tarpheen jälkhiin oornathaan kokkoontumissii. Koulunomistaaja halluu hommata siihen laihiin ette kokkoontumiset piđethään Tronjamissa yhtheistyössä opetuksen tarjoojan kans.

Kontaktitiettoo kaupungin kveenin

Ruijan kväänit Keski-Norja